१० मंसिर, काठमाण्डौ । प्रमुख दुई दल काँग्रेस-एमाले लगायतका दलका नेताहरुले सवै दलको सहमतिमा राष्ट्रिय सरकार गठन गर्नु पर्नेमा जोड दिएका छन् । उनीहरुले सवै सरकारमा सहभागी भए संविधान निर्माण सहज हुने भएकाले राष्ट्रिय सहमतिको सरकारको विकल्प नभएको वताएका हुन् ।  रिपोर्टर्स क्लब नेपालले सोमवार राजधानीमा आयोजना गरेको साक्षात्कारमा नेकपा एमालेकी उपाध्यक्ष विद्यादेवी भण्डारीले सरकार गठन सबै दललाई सहमतिमा ल्याएर हुने वताउनु भएको छ । उहाँले सरकारको नेतृत्व गर्ने अबसर एमालेले पाए नेता केपी शर्मा ओली प्रधानमन्त्री बन्ने दावी समेत गर्नु भयो ।

उहाँले प्रभावशाली नेता ओलीलाई प्रधानमन्त्री बन्ने विषयमा पार्टी भित्र कुनै विवाद नरहेको दावी समेत गर्नु भयो ।  भण्डारीले आगामी संविधानसभाले संघीय लोकतान्त्रिक गणतान्त्रिक नेपालको मान्यता अनुसारको संविधान निर्माण गर्ने र काँग्रेस र एमालेकै एजेण्डा संविधानमा स्थापित हुने बताउनुभयो । उहाँले एमाले संविधान र सरकार निर्माणका लागि सहमतिमै अघि बढ्नु पर्ने पक्षमा रहेको स्पष्ट पार्नु भयो । एमालेले सहमतिकै आधारमा सरकार निर्माण गर्न पहल गर्ने जानकारी दिँदै उहाँले जनमत विरुद्ध गएर अधिनायकबाद तर्फ उन्मुख नहुन एमाओवादीलाई सुझाव दिनुभयो । उहाँले निर्वाचनको प्रक्रियामा भाग लिएपछि परिणाम नस्विकार्नु राजनीतिक चरित्र नभएको दावी गर्नु भयो । उहाँले भन्नुभयो,’एमाओवादी संविधानसभामा आउँछ । उसलाई भाग्ने ठाँउ छैन । ‘

काँग्रेसकी नेतृ सुजाता कोइरालाले काँग्रेस ठूलो दल भए पनि आफूहरु सबैलाई मिलाएर सहमति, सहकार्य र एकताका साथ संविधान र सरकार निर्माणको पक्षमा रहेको स्पष्ट पार्नु भयो । उहाँले काँग्रेस ठूलो दल भए सभापति सुशील कोइरालाको नेतृत्वमा सहमतिको सरकार निर्माण गरिने स्पष्ट पार्नु भयो । काँग्रेसले चुनावी सफलता हासिल गरेको र पार्टीमा पहिला नै कोइरालाको नाम प्रस्तावित भईसकेकोले सर्वसम्मत रुपमा सभापति कोइराला नै प्रधानमन्त्री बन्ने उहाँले दावी गर्नु भयो ।

नेकपा मालेका महासचिव सीपी मैनालीले जसको बढी सिट आए पनि मुलुकलाई सहमतिकै आधारमा अघि बढाउनु पर्नेमा जोड दिनुभयो । उहाँले जित्नेले सबैलाई मिलाएर राष्ट्रिय सहमतिको सरकार बनाए संविधान निर्माण सहज हुने तर्क गर्नु भयो । उहाँले ठूला दलहरुलाई पद्धतिबाट अघि बढ्न आग्रह गर्दै प्रधानमन्त्री को बन्ने भन्ने विवादमा लागे फेरि पनि अवस्था विगार्न सक्ने आशंका ब्यक्त गर्नुभयो ।