१४ मंसिर, काठमाडौं । यूएईमा जारी विश्व ट्वान्टी–२० छनोट क्रिकेटको सेमिफाइनलमा नेपाल आज अफगानिस्तानसंग खेल्दैछ । अबुधावीमा नेपाली समय अनुसार पौने ४ बजेपछि हुने खेलमा नेपाल समूह चरणमा बेहोरेको हारको बदल लिने प्रयासमा हुनेछ ।

समूह चरणको दोस्रो अन्तिम खेलमा अफगानिस्तानले नेपाललाई ९ विकेटले पराजित गर्दै समूह विजेता बनेर विश्व कपमा स्थान बनाएको थियो । वर्षाका कारण ७ ओभरमा छोट्याइएको खेलमा नेपालले पहिले व्याटिङ गर्दै ३ विकेटको क्षतिमा ७३ रन बनाएको थियो, जसलाई अफगानिस्तानले ४ बल बांकी छँदा मात्र १ विकेटको क्षतिमा भेट्टाएको थियो ।

नेपालले भने बुधबार भएको खेलमा हङकङलाई ५ विकेटले पराजित गर्दै पहिलो पटक ट्वान्टी–२० विश्वकपका लागि छानिएको हो ।

विश्वकप छनोटमा नेपाल र अफगानिस्तान तेस्रो पटक आमने सामने हुन लागेका हुन् भने ट्वान्टी–२० क्रिकेटमा छैटौं भेट हो, जसमा सबै खेल अफगानिस्तानले जितेको छ ।