नेपाल समाचारपत्र,काठमाडौं
‘हामीले बच्चादेखि नै यो सपना देख्दै आएका थियौं। अहिले साकार गर्ने भूमिकामा छौं। यो अवसर हामी गुमाउन चाहदैनौं।’ टी–२० विश्वकप छनोट खेल्न यूएई जानुअगाडि नेपालका कप्तान पारस खड्काले यसो भनेका थिए। त्यो दिन आज हो। आज नेपाल र हङकङबीचको खेल जिते नेपाल अर्को वर्ष बंगलादेशमा हुने २० ओभरको विश्वकप खेल्नेछ।
नेपाली क्रिकेट प्रेमीहरू आज पौने १२ बजे यूएईको अवुधावीस्थित शेख जायद स्टेडियममा हुने प्रतियोगिता पर्खिरहेका छन्। झन्डै ५ हजार नेपालीको भीड प्रत्यक्ष रुपमा हेर्न त्यहाँ पुग्ने अनुमान गरिएको छ भने समाचारमा यसलाई प्रत्यक्ष पछ्याउनेको संख्या लाखौंको हुनेछ।
नेपालले कस्तो प्रदर्शन गर्ला आज ? अधिकांश क्रिकेटप्रेमीको प्रश्न र कौतुहलता यही हुनेछ। जवाफ खोज्नेहरू नेपाली जितको कामना गरिरहेका छन्। ‘जसले कम गल्ती गर्छ, उसैले जित्नेछ।’ नेपालका पूर्वकप्तान विनोद दासको भनाइ छ– ‘यो स्टेजमा हामीले गल्ती गर्नुहुन्न। बाँकी नेपाली टोली हङकङलाई जित्न योग्य टोली हो भन्नेमा कुनै शंका छैन।’ दासकै भनाइअनुसार दुवै टोली कमजोर छैन। सही समयमा कसले आफ्नो क्षमता देखाउँछ,त्यही टोलीले जित्ने हो।
टी–ट्वेन्टीको इतिहास हेर्दा नेपाल र हङकङ समान स्तरमा छन्। चार खेलमा दुवैले हारजित बराबर बाँडेका छन्। एक जित र हार त कीर्तिपुर क्रिकेट मैदानमै भएको हो। यद्यपि नेपालको हकमा हङकङविरुद्ध खेल्दा टोलीका खेलाडीहरूमा एक खाले आत्मविश्वास भने हुनेछ, जुन अफगानिस्तानसँग खेल्दा कहिलेकाहीं नेपाली टोलीमा देखिँदैन।
नेपालको शक्ति
कप्तान पारस खड्काको नेपाली टोली चालु विश्वकप यात्रामा सबल टोलीमध्ये एक हो। टोलीले कप्तान पारसमाथि धेरै विश्वास गर्छ। तर त्यतिमात्र होइन, यूएईमा फरक खेलमा फरक खेलाडीहरूले प्रस्तुति दिएका छन्। केन्याविरुद्धको १ सय ८२ रनको पहाड चढ्न अन्तिम ओभरमा शरद् भेषावकरले ३ छक्का ठोकेका छन्। खेल अगाडि बढ्दै गर्दा उपकप्तान ज्ञानेन्द्र मल्लको फर्म चढेको छ। विनोद भण्डारी ठीकठाक छन्। ओपनर सुभाष खकुरेललाई सागर पुनले साथ दिन थालेका छन्।
बलिङतर्फ वसन्तको फर्म जारी छ। तर कप्तान पारसले सबैभन्दा बढी १० विकेट लिएर बलिङ क्याम्पमा राम्रो साथ दिइरहेका छन्। वसन्तको भागमा ९ विकेट छ। उनी आज पनि हङकङलाई हराउने मुख्य खेलाडी बन्न सक्छन्। विनोद दास भन्छन्– ‘आजको खेलमा नेपाली स्पिनरको भूमिका पनि महत्त्वपूर्ण हुनेछ।’
पारस खड्का त छँदै छन्। पहिलो दुई खेलमा चम्केका उनको ब्याट पछिल्लो दुई खेलमा चल्न पाएको छैन। सायद त्यो आजको लागि हुन सक्छ।
हङकङको कुरा
हङकङका कप्तान जेम्स एटिक्सन उच्च फर्ममा देखिएका छन्। उनले ७ खेलमा २ सय ३६ रन जोडे। तर हङकङ क्याम्पका खतरनाक खेलाडीहरू भने मुनिर दार र इरफान अहमद नै हुन्। बायाँ हाते स्पिनर मुदिर डारले १४ विकेट लिएका छन् र उनी हार्ड हिटर पनि हुन्। इरफान अहमद सबैभन्दा खतरनाक खेलाडी हुन्। यी दुईलाई चाँडै पवेलियन फर्काइदिए नेपाललाई खेल नियन्त्रणमा लिन सजिलो हुने दासको विश्लेषण हो।
नेपाल भर्सेस हङकङ
१. १६औं एसियाली खेलकुद–२०१०, ग्याङजाउ (चीन)
नेपाल ३० रनले पराजित । टस जितेर हङकङले ७ विकेट गुमाई १ सय १५ रन बनायो । जवाफमा नेपाल ८ खेलाडी गुमाई ८५ रनमा सीमित भयो ।
२. एसीसी टी–२० २०११ काठमाडौं
नेपाल २ विकेटले विजयी । हङकङले पहिले ब्याटिङ गरी ९ खेलाडी गुमाउँदै १ सय १४ रन
बनायो । जवाफमा नेपालले ८ खेलाडी गुमाई १ सय १५ रन जोड्दै लक्ष्य पूरा गर्यो । पारसले ४४ रन जोडे ।
३. आइसीसी विश्व टी–२० छनोट–दुबई २०१२
नेपाल २८ रनले विजयी । पारस खड्कालको ६८ र ज्ञानेन्द्र मल्लको २६ रनमा नेपालले ६ खेलाडी गुमाई १ सय ३० रन बनायो । जवाफमा हङकङ १ सय २ रनमा रोकियो ।
४. एसीसी टी–२०, काठमाडौं २०१३
नेपाल ६ विकेटले पराजित । पहिले ब्याटिङ गर्दै नेपालले १ सय १५ रन जोड्दा हङकङले १६.३ ओभरमा ४ खेलाडी गुमाउँदै लक्ष्य पूरा गर्यो ।

यूएईमा नेपाली राष्ट्रिय क्रिकेट टोलीले २० ओभरको विश्वकप छनोटको नजिक पुगिरहेको बेला नेपालमा भने ५० ओभरको विश्वकपको तयारी जोडतोडका साथ शुरु भएको छ। आगामी वर्षको जनवरीमा अर्थात् डेढ महिनापछि न्युजिल्यान्डमा हुने ५० ओभरको विश्वकप नेपाली क्रिकेटका लागि अर्को ठूलो अवसर र चुनौतीको रुपमा उभिएको छ। त्यसका लागि नेपाललाई ठूलोभन्दा ठूलो प्रतियोगिताको अभ्यास आवश्यक भएकाले नेपाल क्रिकेट संघको संयोजनमा यही मंसिर १७ गते काठमाडौंमा ५० ओभरको अन्तर्राष्ट्रिय प्रतियोगिता ‘सगरमाथा सिमेन्ट जोर्नी टु वल्र्डकप क्रिकेट’ को आयोजना हुन लागेको हो।
जोरा इन्टरनेसनल प्रालिको आयोजनामा तथा सगरमाथा सिमेन्टको मुख्य प्रायोजनामा हुने प्रतियोगितामा नेपालको राष्ट्रिय टोलीले सिंगापुर, भारतको एयर इन्डिया र भारतकै दिल्ली वन्डरर्ससँग खेल्नेछ। भारतीय क्लबहरूमा भारतको चर्चित लिग आईपीएलका चर्चित खेलाडीहरू तथा रणजी ट्रफीका खेलाडीहरूको सहभागिता हुने भएका छन्।
नेपालका प्रशिक्षक पुबुदु दासानायकेले पनि नेपाली टोली अहिले २० ओभरको प्रतियोगितामा खेलिरहेको हुनाले सो प्रतियोगिताले टोलीलाई ५० ओभरको प्रतियोगिताको ढाँचामा लाने बताउनुभएको छ। उहाँले यूएईबाट सन्देश पठाउँदै भन्नुभएको छ– ‘हामी अहिले २० ओभरको विश्वकपमा पुग्ने तयारीमा केन्द्रित भएका छौं र नेपाल फर्किनासाथ खेलाडीहरूलाई ५० ओभरको खेलतिर ढाल्नु परेको छ। त्यसैले अन्तर्राष्ट्रिय टोलीसँग खेलेर अभ्यासको थालनी गर्दा खेलाडीहरूलाई निकै फाइदा पुग्नेछ।’
प्रशिक्षक दासानायकेले थप्नुभयो– ‘न्युजिल्यान्डको विश्वकप छनोट नेपाली क्रिकेटको परिवर्तको अर्काे ठूलो कोसेढुंगा सावित हुन सक्छ। यसका लागि आधारभूत अभ्यासमात्र होइन, ठूलो म्याच प्राक्टिसको केटाहरूलाई जरुरी छ।’ कीर्तिपुर क्रिकेट मैदानमा एक सातासम्म हुने सो प्रतियोगितालाई न्युजिल्यान्डको हावापानीसँग मेल खाने हुनाले फाइदा पुग्ने विश्वासमा छन् पूर्वकप्तान विनोद दास। प्रतियोगिताको टेक्निकल डाइरेक्टरसमेत रहनुभएका दासले भन्नुभयो– ‘न्युजिल्यान्ड र नेपालको मौसममा यति बेला खास अन्तर हुने छैन। यस्तोमा ठूला प्रतियोगिताले खेलाडीहरूलाई एउटा खाका दिनेछन्। अनि प्रशिक्षकले पनि खेलाडीहरूको कमजोरीको विश्लेषण गर्ने राम्रो अवसर भेट्ने मलाई विश्वास छ।’
नेपाली राष्ट्रिय क्रिकेट टोली हरेक ठूला प्रतियोगिता खेल्नुअगाडि अभ्यासका लागि विदेशमा जाने वा नेपालमै अभ्यास गर्ने गर्दथ्यो। यसपाली अभ्यासका लागि कममात्र समय भएकाले नेपाल क्रिकेट संघले न्युजिल्यान्ड उड्नु अगाडीसम्मको टोलीको तालिका बनाइसकेको छ। सगरमाथा सिमेन्ट जोर्नी टु वल्र्डकप त्यो अभियानको शुरुआत हो।
यूएईमा विश्वकप छनोट खेल्न जानुपूर्व नै प्रशिक्षक दासानायके र नेपाली कप्तान पारस खड्काले यो प्रतियोगिताको आयोजनाबाट खुसी व्यक्त गरेका थिए। कप्तान पारस खड्काले भिडियो सन्देशमा भनेका छन्– ‘प्रतियोगिताजस्तो राम्रो अभ्यास नेटमा हुँदैन। यो खेलमा हुने जितहार न्युजिल्यान्ड जानुपूर्व हाम्रो लागि शिक्षा लिने पहिलो खुड्किलो हुनेछ। घरेलु समर्थकअगाडि खेल्दाको जस्तो राम्रो अभ्यास र गम्भीरता अरु बेला हुनेछैन।
प्रतियोगिताको आयोजनाको जिम्मा लिएको जोरा इन्टरनेसनल प्रालिले पनि प्रतियोगितको तयारी जोडतोडका साथ हुन लागेको जनाएको छ। प्रतियोगिता प्रवद्र्धनका लागि मुख्य प्रायोजक सगरमाथा सिमेन्टले पनि योजनाहरू अगाडि सारिरहेको जनाएको छ। सगरमाथा सिमेन्टद्वारा मुख्य प्रायोजित यस प्रतियोगिता सगरमाथा सिमेन्ट जोर्नी टु वल्र्डकपले नेपाली टोलीलाई उत्साहका साथै हौसला प्रदान गर्नेछ। सगरमाथा सिमेन्ट घोराही सिमेन्ट इन्डष्ट्रि प्रालिको उत्कृष्ट उत्पादन हो।
फेरि नेपाली राष्ट्रिय टोलीको खेल दर्शकहरूले कीर्तिपुरमा प्रत्यक्ष नहेरेको धेरै समय भइसकेको छ। त्यसैेले २० ओभरको विश्वकपमा छनोट भएर फर्केको नेपाली टोलीलाई दर्शकहरूले कीर्तिपुरमा न्यानो स्वागत र समर्थन गर्ने विश्वास पनि गरिएको छ।