१४ मंसिर, काठमाडौं । संविधान सभामा चौथो शक्ति बनेको राप्रपा नेपालका अध्यक्ष कमल थापाले आफ्नो दललाई राष्ट्रपति, उपराष्ट्रपति, सभामुख र उपसभामुख गरी चारवटा पदहरुमध्ये चौथो दलको हैसियतमा कुनै एउटा पद चाहिने बताउनुभयो । प्रधानमन्त्री पदमा भने राप्रपा नेपालको कुनै दाबी नरहेको र सरकारमा समेत नगई प्रतिपक्षमै बस्ने थापाले बताउनुभयो ।

‘मुख्य पाँचवटा पदहरु छन्, राष्ट्रपति, उपराष्ट्रपति, प्रधानमन्त्री, सभामुख र उपसभामुख । सरकारको कुरा त सकिइगयो, हामी त्यहाँ जाँदैनौं । बाँकी रहेका चारवटा पदमा चौथो शक्तिको नाताले स्वाभाविकरुपमा हाम्रो पनि दाबी रहन्छ ।’ विहीबार पार्टी कार्यालय धुम्बाराहीमा अनलाइनखबरसँग कुराकानी गर्दै आध्यक्ष थापाले भन्नुभयो ‘अब मनोनयन हुने २६ जना सभासदमा हैसियत अनुसारको सीट हामीलाई पनि चाहिन्छ ।’

अध्यक्ष थापाले मनोनित हुने २६ सभासदमध्ये चौथो दलको भागमा पर्ने संख्या नदिए प्रतिरोध गर्ने चेतावनीसमेत दिनुभयो । ‘हाम्रो भागमा कति पर्छ थाहा भएन, तर भाग हामीलाई चाहिन्छ,’ उहाँले भन्नुभयो, ‘प्रतिशतका आधारमा हामीलाई भाग लगाइएन भने जुन ढंगबाट प्रतिरोध गर्नुपर्छ, गर्छौ ।’

थापाले राष्ट्रपति, उपराष्ट्रपति, सभामुख र उपसभामुखमध्ये एउटा पद राप्रपा नेपाललाई चाहिने बताए पनि कुन पद भन्ने खुलाउनुभएन । तर, विगत संविधानसभामा उपराष्ट्रपति तत्कालीन चौथो दल मधेसी जनअधिकार फोरमको कोटामा परेको हुनाले राप्रपा नेपालले ‘ चौथो दलको हैसियतअनुसारको पद भन्दै उपराष्ट्रपति ताकेको संकेत देखिएको छ । २६ जना मनोनित सभासदलाई ठूला दलबाट भाग लगाउने हो भने राप्रपा नेपालका भागमा १ सीटसम्म पर्न सक्ने देखिन्छ । तथापि दलहरुले जनआन्दोलनका सहभागी दलहरुवीच यी सीटहरु भाग लगाउँदै आएकाले राप्रपा नेपालले पाउने सम्भावना भने कमै देखिन्छ ।

पहिलो संविधानसभाले राजतन्त्रको अन्त्य गरेकोमा असहमत जनाउँदै आएको राप्रपा नेपालले राजतन्त्रको सवालमा आफूलाई लचिलो ढंगले प्रस्तुत गर्ने संकेत दिएको छ ।

पहिलो संविधानसभाले गरेको राजतन्त्रको घोषणालाई उल्टाउनुहन्छ कि हुन्न भन्ने अनलाइनखबरको प्रश्नमा अध्यक्ष थापाले भन्नुभयो- ‘त्यसलाई अब विवादमा ल्याइरहनुपर्ने जरुरी किन छैन भने त्यो विघटन भएर स्वतःरुपमा गइसकेको छ । त्यसको अब अस्तित्वै छैन । हामी त्यहाँ राजतन्त्रको प्रश्न उठाउँदैनौं । अब नयाँ शिराबाट अगाडि बढ्नुपर्ने छ, नयाँ ढंगबाट अघि बढिसकेपछि हामी पुरानो कुरा उठाउँदैनौं ।’

संविधानसभाको चौथो ठूलो दल राष्ट्रिय प्रजातन्त्र पार्टी नेपाल प्रतिपक्षमा बस्ने भएको छ । ‘हामी वैकल्पिक प्रजातान्त्रिक शक्तिका रुपमा स्थापित भएका छौं’ थापाले भन्नुभयो- ‘जनताले हामीलाई प्रतिपक्षमा बस्ने जनादेश दिएका छन् । हामी सत्ताको फोहोरी खेलमा लाग्दैनौं ।’

अध्यक्ष थापाले नयाँ जनादेशअनुसार राष्ट्रपति, उपराष्ट्रपतिसहितका संवैधानिक निकायको नयाँ निर्वाचन गर्न समेत माग गर्नु भएको छ । प्रत्यक्षतर्फ आफ्नो पार्टीका उम्मेदवाहरु हारेको तर एजेण्डाले जितेको भन्दै उहाँले संविधानसभामा शसत्त र रचनात्मक भूमिका खेल्ने बताउनुभयो ।

अघिल्लो संविधानसभाले गरेका निर्णयहरु स्वीकार्य नहुने भन्दै उहाँले भन्नुभयो-’मृत्युवरण गरेको संविधानसभाको विरासता बोक्न सक्दैन, पहिलो दिनबाटै हरेक विषयमा नयाँ शिराबाट बहस प्रारम्भ हुन्छ ।’ जनताले ०६२/०६३ आन्दोलनको बैचारिक अतिवाद र शक्तिलाई पनि कमजोर पारेको र आफूहरुलाई पनि बहुमत नदिएको भन्दै उहाँले मध्यमार्गी वैचारिक मागचित्र अनुसार अघि बढ्नु पर्ने बताउनुभयो ।

संवैधानिक राजतन्त्रसहितको प्रजातन्त्र र सनातन हिन्दु राष्ट्रको एजेण्डामा पनि सम्झौता हुन्छ भन्ने प्रश्नमा उहाँले भन्नुभयो-अहिले हामी हाम्रो एजेण्डामा प्रतिवद्ध छौं । तर, संविधान निर्माणमा सहमति र सम्झौताको पक्षमा छौं ।’

राप्रपा नेपालले संविधानसभा निर्वाचनमा गम्भीर विकृति र विसंगती देखिएको भन्दै छानविनको माग गरेको छ । पैसाले मत किनेको देखि मत पेटिका संकलन, व्यवस्थापन र गणनामा लापर्वाही भएको र यसले गम्भीर आशंका उब्जाएको भन्दै अध्यक्ष थापाले आगामी दिनमा यस्तो हुन नदिन संसदबाट सर्वदलीय समिति गठन गर्न समेत गर्नु भएको छ । प्रत्यक्षमा भन्दा समानुपातितकमा ९ लाख ५७ हजार मत बढी देखिएको भन्दै उहाँले प्रष्ट पार्न निर्वाचन आयोगसँग माग गर्नुभयो ।