११ मंसिर काठमाडौं । शंकास्पद कारोबारबारे अनुसन्धान गरी सम्पत्ति सुद्धिकरण अनुसन्धान विभागलाई सूचना दिँदै आएको वित्तीय जानाकारी इकाइले संकास्पद कारोबारको स्वत विश्लेषण र रिपोर्टिङ गर्ने सफ्टवेर ल्याउने तयारी गरेको छ । संयुक्त राष्ट्र संघको युएनओडीसीले निर्माण गरेको ‘गो एम एल’ सफ्टवेर ल्याउने तयारी भइरहेको इकाइका प्रमुख मुकुन्द महतले जानकारी दिनुभयो । महतका अनुसार आगामी बैशाखसम्ममा उक्त सफ्टवेर प्रयोगमा ल्याइनेछ ।

उक्त सफ्टवेरको प्रयोगपछि ग्राहकले बैंकमा खाता खोल्दा दिएको विवरणअनुसार कारोबारको आकार अपत्यारिलो भए उक्त सूचना स्वतः सम्बन्धित निकायमा पठाउँछ । ‘सफ्टवेरले ठूलो मात्राको तथ्यांकको विश्लेषण गरी स्वतः सम्बिन्धत ठाउँमा रिपोर्टिङ गर्ने भएकाले तीव्र गतिमा काम अघि बढ्छ र अन्तराष्ट्रिय समूदायसँग पारदर्शि हुन्छौं ।’ महतले भन्नुभयो । सफ्टवेर प्रयोग गरेबापत पहिलो वर्ष १ लाख डलर, दोस्रो र तेस्रो वर्षर् ८० हजार डलर तिर्नुपर्ने र चौथो वर्षदेखि नयाँ भर्सन प्रयोग गर्न मात्रै चार्ज तिर्नुपर्ने उहाँको भनाई छ ।

संसारभरका अधिकांश वित्तीय जानकारी इकाई र अन्तराष्ट्रिय मुद्रा कोष -आइएमएफ)ले यही सफ्टवेरको प्रयोग गर्दै आएका छन् । अन्तराष्ट्रिय समुदायकै दबाबमा राष्ट्र बैंकले गो एम एलसफ्टवेर ल्याउने निर्णय गरेको हो ।यसअघि सफ्टवेयर खरिदका लागि बोलपत्र आह्वान गरेपनि खरिद गर्न असफल भएपछि राष्ट्रबैंकले आफैले बोलपत्र आह्वान नगरि किन्न लागेको हो ।गैरकानूनीरुपमा आर्जित सम्पत्तिलाई सेतो धनमा रुपान्तरण गर्न नदिन र सेतो धनलाई लागूऔषध तथा आतंककारी गतिविधिमा लगानी हुन नदिन बनेको ऐन ‘सम्पत्ति सुद्धिकरण निवारण ऐन २०६४’ को कार्यान्वयन गर्ने क्रममा बैंक तथा वित्तीय संस्थामा भएको कारोबारबारे जानकारी लिन राष्ट्र बैंकले वित्तीय जानकारी इकाई गठन गरेको थियो ।