'नराम्री भन्दा रिस उठ्थ्यो’

खासमा युवतीहरूलाई सौन्दर्यको तारिफमा ख्याल गर्नुपर्छ । नराम्रो भनिदिँदा जसको पनि मन चसक्क पर्छ नै । नायिका अनुष्का शर्मालाई पनि कसैले नराम्रो भनिदियो भने यस्तै रिस उठ्ने रहेछ । तर यो फिल्ममा खेल्न आउँदाको सुरुवाती दिनमा रे । हालैको एक अन्तर्वार्तामा अन्तरंग कुराकानी गर्ने क्रममा अनुष्काले यसो भनेकी हुन् । क्रिकेटर विराट कोहलीसँगको सम्बन्धलाई लिएर सहरमा गाइँगुइँ चलिरहेका बेला अनुष्का उक्त सम्बन्धलाई भने केवल साथीको रूपमा मात्रै रहेको जिकिर गर्छिन् । तीनदिने स्याम्पुको विज्ञापनका क्रममा विराटसँग नजिकिएको उनले बताइन् । 'पहिले त मलाई ऊ घमण्डी होला जस्तो लागेर म पनि नबोलिकनै बसें । तर सुटिङको दोस्रो दिन ह्याङ आउट पार्टीमा मिलनसार पाएँ,' हिरोइन बनेको पाँच वर्षमै 'एनएच १०' फिल्ममार्फत कान्छी निर्मात्री बन्दै गरेकी अनुष्का स्वयं भने एकखाले घमण्डी नै रहेको पुष्टि गर्छिन् । 'सुरुताक एक अनलाइनमा मेरो फोटो राखिएको थियो । जसको तल केहीले नराम्री भनेर कमेन्ट गरेको देख्दा भाउन्न रिस उठेको थियो,' हालैको कुराकानीमा उनले भनिन्, 'तर अहिले त सबै कुरा पचाउन सक्ने भएकी छु । त्यस्ता कुराले खासै फरक पार्दैन ।'
बरु उनलाई अचेल भने अर्कै कुराको तनाव रहेछ । छोटो समयमै फिल्म निर्माणमा हात हालेपछि केहीले मुखै खोलेर भन्दा रहेछन्, 'अहिले नै निर्माता बन्ने हतारो किन गरेको होला ? खुरुक्क करिअरमै ध्यान नदिएर ।' अनुष्का प्रतिप्रश्न गर्छिन्, 'निर्माणमा हात हाल्दैमा के मेरो करिअर नै सकियो र ? चौपट नै भएझैं गर्छन् त ।' त्यसो त उनले फिल्म निर्माण गर्ने योजनाबिनै अनुराग कश्यपको काम र फिल्म स्त्रिmप्टले लोभिएर लगानी गर्न तयार रहेको बताइन् ।

Labels: मनोरंजन