सोमबार बिहान बबरमहलमा आयोजित तीन दलको बैठकमा कांग्रेस र एमालेका नेताहरुले अडान नछोडेपछि अपरान्ह पेरिसडाडाँमा एमाओवादी नेताहरु बैठकमा जुटेका थिए । सोही बैठकलाई मंगलबार पनि निरन्तरता दिइएको हो ।

यसैवीच करोडभन्दा माथि रकम बुझाएर एमाओवादीको समानुपातिक सूचीमा नाम चढाउन सफल भएका पूर्वएमाले नेता ल्हारक्याल लामा केही दिनयता अर्धभूमिगत बनेका छन् । पुनः सभासद बन्न चुनावअघि एमाले नेता माधव नेपाललाई पैसाको आश्वासन बोकेर पुगेका लामालाई एमाले नेता नेपालले ठाडै अस्वीकार गरेर पठाएपछि उनी एमाओवादीमा पुगेका थिए ।

एमाओवादीले उनलाई पैसा लिएर मुस्ताङकी टासी स्याङ्मो गुरुङसेनीसँगै पार्टी प्रवेश गराएर सभासदको सूचीमा राखेको थियो । एमालेकी पूर्वसभासद गुरुङसेनी चुनावमा मुस्ताङमा एमाओवादीको चुनाव प्रचारमा खटेकी थिइन् । चुनावपछि गुरुङसेनीले प्रचण्डलाई भेट गरेर रिपोटिङ गरिसकेकी छन् । तर, ल्हारक्याल भने चुनावदेखि नै सम्पर्कमा छैनन् ।’ल्हारक्याल दाइ त नेपालमै हुनुहुन्न जस्तो छ, फोन गर्दा पनि उठ्दैन, मेरो भेटै हुन पाएको छैन ।’ ल्हारक्यालसँगै एओवादीमा प्रवेश गरेकी गुरुङसेनीले भनिन् ।

आफूले गरेको ठूलो लगानी उठाउने र सभासद बन्न लविङ गर्ने बेलामा ल्हारक्याल लापत्ता भएपछि एमाओवादीलाई उनको पैसा पचाउन सहज भएको स्रोत बताउँछ । अर्कोतर्फ ल्हारक्याललाई समानुपातिकको सूचीमा राखेको विषयमा पार्टीभित्रै चर्को आलोचना भएकाले उनलाई ५४ सभासदको सूचीमा पार्न प्रचण्डलाई सहज देखिँदैन ।

एमाओवादी ठूलो पार्टी बन्छ र सभासद हुन पाइएला भनेर निर्वाचनको मुखमा एमाओवादीमा छिरेर सूचीमा नाम चढाउन भ्याएका ‘चैते’हरु पार्टीले ५४ सीटमात्रै हात पारेपछि निराश देखिएका छन् । आफू सभासदको छनोटमा नपरिएला भन्ने चिन्ता उनीहरुमा देखिएको हो । तैपनि कतिपय नवप्रवेशीहरु प्रचण्डलाई भेट्ने समय मागिरहेका छन् ।

अर्कातिर लडाकूको करोडौं रकम भ्रष्टाचार गरेको अभियोग लागेर एकपटक राजीनामा समेत दिइसकेका पूर्वलडाकू कमान्डरहरु भने घुर्की लगाएर भए पनि सभासद् बन्ने दाउमा छन् । पूर्वलडाकू कालीबहादुर खाम, धनबहादुर मास्कीलगायतका छानविनको दायरामा परेकाहरु पनि एमाओवादीको समानुपातिक सूचिमा छन् ।

एमाओवादीले अहिलेसम्म ५४ जना सभासदहरु कुन आधारमा छान्ने भन्नेबारे मापदण्ड बनाएको छैन । निर्वाचन कानून आफैंले तोकेको निर्धारणअनुसार २७ जना महिला, १८ जना जनजाति, ७ जना दलित, १६ जना मधेसी र २ जना पिछडिएको क्षेत्रबाट छान्नुपर्ने बाध्यता छ । तर, यो कानूनी मापदण्डबाहेक एमाओवादीले आन्तरिक मापदण्ड बनाएको छैन ।

संविधानसभामा संघर्ष गर्न सक्ने नेताहरुलाई प्राथमिकता दिन सकिने स्रोत बताउँछ । तर, पुराना दोहोरिने नयाँले अवसर नपाउने सम्भावना पनि छ ।
संविधानसभामा प्रभावशाली भूमिका खेल्न सक्ने लीलामणि पोख्रेल, वर्षमान पुन, पोष्टबहादुर बोगटी, रामचन्द्र झा र उर्मिला अर्यालहरु प्रत्यक्षतर्फ पराजीत भएकाले सब कोटा पुर्‍याउनेतर्फमात्रै जोड दिइयो भने संविधानसभामा प्रभावशाली भूमिका खेलन नसकिने एमाओवादी नेताहरु बताउँछन् । तर, पहिले पनि चुनाव नलडी समासद बनेर मन्त्रीसमेतछ खान भ्याएका केही नेतालाई यसपालि पनि निरन्तरता दिन नहुने आवाजसमेत पार्टीभित्र उठिरहेको स्रोत बताउँछ ।

स्रोतका अनुसार एमाओवादीले सभासदको सूची बुझाउने अन्तिम दिन बुधबार नामहरुलाई अन्तिमरुप दिने भएको छ । तर, एमाओवादीभित्र अन्य समूहका नेताहरु सभासद छनोटमा प्रचण्डले आफूखुशी गोजीबाट नाम झिक्न सक्ने त्राशमा छन् ।