टुडे समाचारदाता

जनकपुरधाम, १२ जेठ ।

धनुषाको नक्टाझिज श्रोत केन्द्र अन्तर्गत पर्ने ३५ वटा सामूदायिक विद्यालयले संचारकर्मी तथा सूचना अभियन्ताहरुलाई विद्यालयको आर्थिक हरहिसाब पारदर्शिताको सम्बन्धमा सूचना नदिने भएको छ । सहायक जिल्ला शिक्षा अधिकारी मिहिलाल यादवको अध्यक्षता बसेको प्रधानाध्यापकहरुको बैठकले संचारकर्मी तथा सूचना अभियन्ताहरुलाई सूचना नदिने निर्णय भएको स्रोतले जनाएको छ । नागरिकले निर्वाद रुपमा हरेक सरकारी तथा गैर सरकारी निकायबाट  सूचना पाउने प्रावधान छ । 

 

स्रोतका अनुसार विद्यालयबाट सूचना प्राप्त गर्न जिल्ला शिक्षा कार्यालयबाट अनुमति पत्र लिएर आएमा मात्र सूचना उपलब्ध गराउने निर्णय समेत गरेको छ । उक्त बैठकको निर्णयबारे नेपाल पत्रकार महासंघलाई समेत जानकारी गराई सोही अनुरुप कार्य गर्न गराउन आग्रह गरिएको बताइएको छ । सामूदायिक विद्यालयहरुमा भैरहेको आर्थिक अनियमितता लगायतका विषयमा संचारकर्मीको माध्यमबाट समय समयमा भण्डाफोर हुने गरेकाले विद्यालयका प्रधानाध्यापकहरुले सही सूचना दिन आनाकानी गर्ने गरेको छ । 

 

यता जिल्ला शिक्षा अधिकारी उपेन्द्र मण्डलले निर्णयबारे आफुलाई केहि जानकारी नभएको बताए । उनले सूचना पाउनु आम नागरिकको अधिकार  भएको बताउदै उक्त निर्णय भ्रष्ट प्रअहरुले गरेको हुन सक्ने उल्लेख गरे ।