नेपाली चलचित्रका गीतलाई आकर्षक बनाउन निर्माताहरुले कञ्जुस्याई गरेका छैनन् । उसो त एक चलचित्रको गीतका लागि १४ लाख खर्च गरिएको सुन्दा तपाइलाई अचम्म पनि लाग्न सक्छ । चलचित्र ‘मोक्ष’मा समावेश एक कन्र्सट गीतको छायांकनका लागि १० लाख माथिको रकम लागेको दाबी निर्माता सुनिल मानन्धरले केही समय अघि गरेका थिए ।हालै मात्र चलचित्र ‘हँसिया’को एक आइटम गीतका लागि पनि मोटो रकम खर्च गरिएको छ । ‘आजको रातमा यो भिडमा यो साँझमा’ बोलको गीतमा नायिकाद्धय हेमा श्रेष्ठ र प्रियंका कार्कीको हट अवतार देख्न सकिनेछ । यो गीतका लागि १४ लाख खर्च भएको निर्देशक मिलन चाम्सको दाबी छ । एक्सन आइटम गीत भनिएको यो गीतमा रेनशा राइको कोरियोग्राफी छ । रेनशाले यो गीत आफ्नो जीवनको अहिलेसम्मकै उत्कृष्ट भएको दाबी गरेकी छिन् ।

शिवानी मोक्तानले आवाज भरेको यो गीतमा कल्याण सिंहको संगीत, निल आङ्बुहाङ राइको शब्द छ । चलचित्रलाई दुर्गा घलेले निर्माण गरेका हुन् । चलचित्रमा राजेश हमाल, अनुप विक्रम शाही र हेमा श्रेष्ठको मुख्य भूमिका छ । अहिले सम्मकै महंगो भनिएको यो गीतलाई अंग्रेजी नयाँ बर्षमा सार्वजनिक गरिनेछ । काठमाण्डौमा चिसो मौसममा प्रियंका र हेमाको यो हट आइटम गीतले कत्तिको तताउने हो, यो हेर्न भने बाँकी नै छ ।