”विगतका अनुभवबाट सिकौँ, अप्ठयारो पर्‍यो भनेर पछि नपरौँ,”- बितेका समयमा भएका परिघटनाबाट पाठ सिकेर अब जुनसुकै हालतमा संविधान बन्नुपर्नेतर्फ सङ्केत गर्दै उहाँले भन्नुभयो । अमेरिकी राजदूताबासका कार्यबाहक राजदूत जोन एल कारवाइलले देशले आफूले के दियो भन्दा पनि आफूले देशलाई के दियौँ भन्ने सोचका साथ नेपालीले राष्ट्र निर्माणको मार्गमा अग्रसर हुनुपर्ने विचार व्यक्त गर्नुभयो । आइभानका अध्यक्ष तारानाथ दाहालले आइभान नेपाल र अमेरिकाबीचको सम्बन्ध विस्तारको सेतु भएको उल्लेख गर्दैै त्यसलाई नेपालको विकास-निर्माणको प्रक्रियामा अझ रचनात्मक ढङ्गले अघि बढाउने प्रतिबद्धता व्यक्त गर्नुभयो । आइभानका उपाध्यक्ष केदार खड्का र महासचिव कोपिला अधिकारीले आइभानका गतिविधिबारे जानकारी गराउनुभएको थियो ।

 कार्यशालामा पूर्वसभासद् राधेश्याम अधिकारीले ‘नयाँ संविधानद्वारा लोकतन्त्रको सुदृढीकरण’, पत्रकार अच्युत वाग्लेले ‘नेपालको बृहत् आर्थिक वृद्धिका लागि समग्र विकास निकायको सहभागिता’, महिला अधिकारकर्मी दुर्गा घिमिरेले ‘महिला बेचबिखनविरुद्धको सङ्घर्ष’ र कानुन व्यवसायी दिनेश त्रिपाठीले ‘स्वतन्त्र एवम् निष्पक्ष संविधानसभा निर्वाचनका निम्ति चुनौती न्यूनीकरण’ विषयक कार्यपत्र प्रस्तुत गर्ने कार्यक्रम छ । रासस