३० पुस, काठमाडौं । एकीकृत नेकपा माओवादी अध्यक्ष प्रचण्डले पार्टी मुख्यालय पेरिसडाँडामा मंगलबार करिब एकघण्टा लगाएर राजनीतिक प्रतिवेदन वाचन गरे । पार्टीको हेटौडा महाधिवेशनले खारेज गरिसकेको पूर्वपोलिटब्यूरो सदस्यहरुको बैठकमा अध्यक्ष प्रचण्डले करिव २० पृष्ठ लामो राजनीतिक प्रतिवेदन पढेर सुनाएका हुन् ।

‘संविधानसभाको निर्वाचन- २०७० को समीक्षा र पार्टी पुनःनिर्माणको ऐतिहासिक आवश्यकता सम्बन्धमा राजनीति र संगठनात्मक प्रस्ताव शीर्षकको उक्त प्रस्ताव प्रचण्डले पढेर सुनाएको प्रवक्ता अग्नि सापकोटाले बताए ।

एकीकृत नेकपा माओवादीभित्र पूर्वपोलिटब्यूरो नामको संरचना खडा गरेर केन्द्रीय समितिलाई बाइपास गरिएको गुनासो केही केन्द्रीय सदस्यहरुले गर्दै आएका छन् । हेटौडा महाधिवेशनले विघटन गरिसकेको पोलिटब्यूरोलाई असन्तुष्ट केन्द्रीय सदस्यहरुले ‘मरिसकेको पोलिटब्यूरो’को संज्ञा दिँदै आएका छन् ।

एक पूर्वपोलिटब्यूरो सदस्यले अनलाइनखबरसँग भने, ‘अध्यक्षले प्रतिवेदनको पूरै पाठ पढेर सुनाउनुभयो, हामीले आफ्ना कुरा बुधबार राख्छौं, त्यसपछि शीर्षनेता बोल्नुहुनेछ ।’ उनका अनुसार प्रचण्डको प्रतिवेदनमा अध्यक्षबाटै आत्मालोचना गर्नुपर्ने, तलदेखि सम्मेलन गर्दै विशेष मधहाधिवेशनसम्म जाने, सरकारमा सहभागी नहुने, केन्द्रीय समिति ९९ सदस्यीय बनाउने, जनताको वीचमा जाने लगायतका विषयहरु परेका छन् ।

प्रवक्ता अग्नि सापकोटाका अनुसार प्रचण्डको प्रतिवेदनमा संविधानसभाको निर्वाचन ०७० को समीक्षा गरिएको छ । साथै प्रतिवेदनमा पार्टी निर्माण बारे, सहिद तथा बेपत्ताहरु परिवारबारे, पार्टी पुनःनिर्माण बारे आदि उपशीर्षकहरु रहेको सापकोटाले जानकारी दिए । अध्यक्षको प्रतिवेदनमा पार्टी शुद्धीकरण र सुदृढीकरण एवं नेताहरुको दैनिक आचरण कस्तो हुने भन्ने पनि उल्लेख छ ।

प्रचण्डको प्रस्तावमा कार्यकर्ताको परिभाषा र कार्यविभाजन, कार्यकर्ता व्यवस्थापन, पार्टी एकता र पार्टी पुननिर्माणको प्रक्रिया लगायतका विषयमा नयाँ ढंगले सुरुवात गर्नुपर्ने उल्लेख रहेको प्रवक्ता सापकोटाको भनाइ छ ।

सापकोटाका अनुसार विहीबार औपचारिकरुपमा केन्द्रीय समितिमा पेस हुने प्रतिवेदनमा बुधबारदेखि सबै पूर्वपोलिटब्यूरो सदस्यले आफ्ना टिप्पणी राख्नेछन् । पूर्वपोलिटब्यूरो सदस्यले आफ्ना धारणा राखिसकेपछि कार्यालयका तर्फबाट पोष्टबहादुर बोगटी, नारायाकाजी श्रेष्ठ, बाबुराम भट्टराई र प्रचण्डले धारणा राख्ने एमाओवादी प्रवक्ता सापकोटाले जानकारी दिएका छन् ।

मंगलबार पेरिसडाँडामा पूर्वपोलिटब्यूरोको बैठक बस्नुअघि सानेपास्थित भट्टराई निवासमा शीर्षनेतावीच छलफल भएको थियो । सो छलफलले पूर्वपोलिट ब्यूरोस्तरमा प्रतिवेदनमाथि छलफल सकेरमात्रै केन्द्रीय समितिमा लैजाने सहमति भएको अर्का एक नेताले अनलाइनखबरलाई बताए ।