पोर्चुगलका कप्तान समेत रहेका रोनाल्डोले २००८ पछि पहिलो पटक बालोन डि’ओर जित्ने क्रममा चार पटकका विजेता बार्सिलोनाका लिओनल मेस्सी र वार्यन म्युनिखका फ्रांक रिबेरीलाई पछि पारे ।

रोनाल्डोले १३६५ अंक पाएका छन् भने मेस्सीले १२०५ र रिबेरीले ११२७ अंक पाएका छन् । जसमा १८४ प्रशिक्षक, १ १८४ राष्ट्रिय कप्तान र १ सय ७३ पत्रकारले मतदान गरेका थिए । उनीहरुले मनोनयनमा परेका तीन खेलाडीलाई ५, ३ र १ अंक दिए ।

पुरस्कार घोषणापछि मञ्चमा सम्बोधनका लागि आएका रोनाल्डो निकै भावुक भएका थिए । ‘सबैभन्दा पहिले आफ्नो क्लब र राष्ट्रिय टोलीका सबै सदस्यलाई धन्यवाद दिन्छु । उनीहरु सबैको प्रयास विना यो सम्भव थिएन’ गहभरी आँसु पार्दै उनले भने–‘म निकै खुसी छु । यो पुस्कार जित्न निकै मुश्लिक छ ।’

उनले आफूसँग जोडिएका सबैलाई धन्यवाद दिँदै आफ्नो पत्नी, छोरा र साथीहरुलाई सम्झिए । सन् २०१३ मा उत्कृष्ट प्रदर्शन गरेका क्रिष्टियानो रोनाल्डोले ५६ खेलमा ६६ गोल गरेका थिए । रोनाल्डोले प्ले अफमा स्वीडेनविरुद्ध ह्याट्रिक गर्दै पोर्चुगललाई विश्वकपमा पुर्याएका थिए ।

चार पटकका विजेता मेस्सी भने चोटका कारण धेरै समय मैदानबाहिर रहे, जसका कारण उनलाई मुख्य दावेदार मानिएको थिएन । रिबेरीले गत सिजन वार्यन म्युनिखलाई च्याम्पियन्स लिगसहित ५ उपाधि दिलाउन महत्वपूर्ण भूमिका खेलका थिए ।

जर्मन गोलरक्षक नदीन आंगरर महिला उत्कृष्ट फुटबलर घोषित भइन् भने पुस्कार गोल अवार्ड जाल्टन इभ्राहिमोभिचले जिते । युद्धग्रस्त देशमा खेललाई बढवा दिएकोमा अफगानिस्तान फुटबल संघलाई फेयर प्ले पुरस्कार प्रदान गरिएको छ ।