नेकपा–माओवादीले नयाँ संविधानसभा विघटन हुनुपर्ने माग गरिरहेका बेला उसकै नेतृत्वमा रहेको ३३ दलीय मोर्चाले भने विघटनको साटो संविधानसभालाई अस्वीकार गर्ने मध्यमार्गी नारा तय गरेको छ । ३३ दलले संविधानसभा बैठकको पहिलो दिन नै संविधानसभा भवन अगाडि विरोध कार्यक्रम गर्ने तयारी गरेको मोर्चाका नेताले अनलाइनखबरलाई जानकारी दिएका छन् ।

हालै सम्पन्न ३३ दलीय मोर्चाको बैठकमा वैद्य माओवादीका नेताले नयाँ संविधानसभा विघटनको माग राखेर आन्दोलनमा जाने प्रस्ताव राखेका थिए । तर, ३३ दलीय मोर्चाको कार्यदलमा रहेका एक नेताले अनलाइनखबरसँग भने–‘माओवादी सचिव देव गुरुङले संविधानसभा विघटनको प्रस्ताव ल्याउनुभएको थियो । तर, सामाजिक लोकतान्त्रिक पार्टीका नेता पासाङ शेर्पाले बहिस्कारको प्रस्ताव राख्नुभयो । पछि गुरुङले विघटनको साटो अस्वीकारको प्रस्ताव ल्याएपछि सहमति भएको छ ।’

आ–आफ्ना पार्टीको धारणालाई कायम राख्दै ३३ दलीय मोर्चामा संविधानसभा अस्वीकारको एजेण्डा लिएर आन्दोलनमा जाने नेताहरुको सहमति छ । ‘गुरुङजीहरुले संविधानसभा विघटनको पार्टीको अडान पनि कायमै छ भन्नुभएको छ’ एक नेताले भने–‘तर, ३३ दलमा संविधानसभा अस्वीकारको नारामा आउनुभएको छ ।’

संविधानसभाको पहिलो बैठक नबसेसम्म सांगठनिक तयारीमा जुटेका नेताहरु अब आन्दोलनको कार्यक्रम बनाउन जुटेका छन् । ‘अस्वीकार गर्ने भनेपछि संविधानसभाको पहिलो बैठककै दिन केही न केही कार्यक्रम त गर्नैपर्छ’ कार्यदलमा रहेका नेताले भने–‘ यसका लागि छलफल गर्दैछौं ।’
संविधानसभा चुनाव बहिस्कार गरेको ३३ दलीय मोर्चाले राजनीतिक गोलमेच सभा गरेर नयाँ संविधान निर्माणमा सबैलाई सहभागी गराउनुपर्ने माग राख्दै आएको छ ।

संविधानसभालाई अस्वीकार गर्ने या बहिस्कार गर्ने भनिसकेपछि जुन पदावलि प्रयोग गरिए पनि अन्ततः संविधानसभा विघटन हुनुपर्छ भन्ने नै स्पिरिट रहेको माओवादी सचिव गुरुङको भनाइ छ, भाषा जस्तो प्रयोग गरिए पनि संविधानसभा अस्वीकार गर्ने भनेको अन्ततः विघट हुनुपर्छ भन्ने नै हो, गुरुङले अनलाइनखरसँग भने, ‘आन्दोलनको बलले यो संविधानसभालाई विघटन गराउनेतिर नै हाम्रो जोड रहने छ’ ३३ दलीय मोर्चाको संयोजन गरिरहेका गुरुङले अनलाइनखबरसँग भने ।

दोस्रो संविधानसभाले मुलुकलाई ०५० अगाडि फर्काएको बताउँदै गुरुङले यसले मुलुकको राजनीतिमा अवरोध सिर्जना गरेको आरोप लगाए । संविधानसभाको पहिलो बैठक बस्नुपूर्व ३३ दलको बैठक बसेर आन्दालनेको कार्यक्रम तय गर्ने तयारी भइरहेको उनले बताए ।