एक नेपाली छात्राको साथमा रहेको हाते झोला लुटिएपछि त्यो खोस्ने क्रममा लखेट्दै चोर पिटेको अभियोगमा चार नेपाली विद्यार्थीले गिरफ्तारीसहित जेल सजाय भोग्नु परेको छ । घट्ना गत २२ डिसेम्बर राती भएको हो । सेन्ट्रल लन्डनस्थित सोहोमा चालु एक जापानीज रेष्टुरेन्टमा कार्यरत नेपालीहरु कामपछि त्यहीं क्रिसमस पार्टी गरेर घर फर्कंदै थिए, एक अपरिचित व्यक्तिले नेपाली छात्राको ह्याण्ड व्याग लुट्यो । 
व्याग लुटिएपछि नेपालीको समूहले त्यो चोर लखेट्दै पिट्न थालेको र एक विदेशी युवतीले तिनलाई छुट्याउन खोज्दा युवतीलाई नै पिटेको अभियोग प्रहरीले  विद्यार्थीमाथि लगाएको छ । झगडाबीच कसैले प्रहरी बोलाइदिएपछि प्रहरी तत्काल आइपुग्दा चोर त भागिसकेको थियो तर नेपाली विद्यार्थी समातिए । गिरफ्तार विद्यार्थी छुटाउन लन्डनस्थित नेपाली दूतावासको पहल पनि काम लागेन ।
अन्ततः ति विद्यार्थीलाई प्रहरीले हातपातको अभियोगमा गिरफ्तार गरि जेल लगेर मुद्दा दायर गर्यो । समातिएका मध्ये एकजना भोलिपल्ट र तीन विद्यार्थी साता दिन पछि जेलबाट धरौटीमा रिहा भएका छन् । हाइवरी कोर्टले जनही दुई हजार पाउण्ड (करिब तीन लाख बीस हजार रुपैयां) मा ति चार जनालाई धरौटीमा रिहा गरेको हो, जसको सुनुवाइ आगामी ७ जनवरीका दिन दक्षिण पूर्वी लन्डनको क्राउन कोर्टमा हुंदैछ । यो मुद्दा हेर्न विद्यार्थीलाई सरकारी वकिल दिइएको छ । मुद्दा छिनोफानो हुन कम्तीमा तीनमहिनासम्म लाग्ने अनुमान छ । विद्यार्थीले भने आफूहरु निर्दोष रहेको दावी गर्दै अभियोग अस्वीकार गरेका छन् ।
सोलिसिटर राजु थापाका अनुसार, बेलायतको कानुनले जो कोहीमाथि हातपात गर्नुलाई गम्भीर अपराधका रुपमा लिन्छ । धरौटीमा रिहा भएपनि ति विद्यार्थीलाई सांझ ६ देखि विहान ६ बजेसम्म कतै हिंड्डुल गर्न बन्देज छ भने उनीहरुलाई विद्युतीय ट्याग लगाइएको छ । यस अवधिमा उनीहरुले आफ्नो ठेगाना परिवर्तन गर्न पाउने छैनन् भने ट्राभल डकुमेन्ट लिन र इंग्ल्याण्ड तथा वेल्स् जान पनि प्रतिवन्ध छ ।
लहैलहै र पार्टीको सुरमा आक्रामक बन्दा आइलागेको कानुनी झमेलापछि ति विद्यार्थीको अध्ययन र जागिर गुम्ने खतरा त बढ्यो नै, ति विद्यार्थीका परिवारलाई समेत चिन्तित तुल्याएको छ ।

0 comments

Write Down Your Responses