नेपाल चलचित्र प्राविधिक संघ र सुवास इन्टरटेन्मेन्टले मलेसियामा माघ १७ गते आयोजना गर्न लागेको ‘छैटौ नेफ्टा अवार्ड‘को लागि राज्य स्तरबाट सहयोग नभएको गुनासो आइरहेको छ ।

विदेशमा एउटा चलचित्र सम्बन्धी संस्थाले गर्न लागेको अवार्ड कार्यक्रममा चलचित्र बिकास बोर्ड मौन छ । नेपाली सिनेमाको बिकास र विस्तारका लागि नेपाल बाहिर हुन लागेको अवार्डलाई राज्यको तर्फबाट हौशला मिल्नु पर्ने तर्कहरु पनि नआएका होइनन् ।

यस बिषयमा चलचित्र बिकास बोर्डका अध्यक्ष धमेन्द्र मरबैत्ता ‘पप्पु’ पनि जानकार छन् । अनलाइनखबरसँग कुरा गर्दै उनले बोर्डले सहयोग नगर्ने भन्ने त कुरा नै नभएको भन्दै चाडै नै निर्णय गरिने जनाएका छन् । बोर्डमा यतिबेला सदस्य नभएकाले पनि निर्णय लिन गाह्रो भएको उनको भनाई छ । केही रकम बोर्ड अध्यक्ष आफैले निर्णय गर्न सक्छन् । तर ठूलै रकम सहयोग गर्नु परेको खण्डमा बोर्ड अध्यक्षले बैठक बोलाउनु पर्ने हुन्छ ।

बोर्डमा सहयोगका लागि निवेदन आएको भन्दै पप्पुले प्राविधिक संघलाई सहयोग गर्न आफूहरु तयार भएको बताए । केही दिनमै सदस्यहरुको नियुक्ती हुने भन्दै उनले त्यस लगतै निर्णय गरेर सहयोग गर्ने जनाएका छन् ।