१३ मंसिर, काठमाडौं । संविधानसभा निर्वाचनको पूर्वसन्ध्यामा व्यवसायी मोति दुगडले खोलेको नवनेपाल निर्माण पार्टीको तामझाम निकै थियो । पाँचतारे होटलमा कार्यक्रम, पत्रपत्रिकाको मूख्य पृष्ठमा विज्ञापन, शहरका भित्ताहरुमा वाल पेन्टिङ । प्रचार-प्रसारमा दुगडले कुनै कमी गरेका थिएनन् । दुगड कम्पनीको मसलाको टिसर्ट लगाएर हिँड्नेहरुले रातारात भेष बदलेर नवनेपाल निर्माण पार्टीको टिसर्ट र टोपी पहिरिएका थिए । दुगडले एभरेष्ट होटलमा गरेको कार्यक्रमको प्रसारण टीभीले चुनावभर गरेको थियो । कार्यक्रम हेर्दा यस्तो लाग्थ्यो, देशका सुकिला मुकिला र शहरिया बुद्धिजीवीहरु सबैजना दुगडकै पक्षमा लागिसकेका छन् ।

पहिलो संविधानसभामा पार्टीलाई चन्दा दिएर सभासद बनेका मसला व्यापारी दुगडले अरुलाई दिने चन्दा आफैं खर्च गरेर संविधानसभामा पुग्ने बाटो रोजेका थिए । संविधानसभामा जाने दुगडको यस्तो काइदा देखेर धेरैले पैसा खर्च गर्न र २० जनासम्म उम्मेदवार बनाउन सक्ने हो भने संविधानसभामा पुग्न सजिलो हुने रहेछ भन्ने निश्कर्ष समेत निकाल्न थालेका थिए । तर, निर्वाचन परिणामले भने दुगडलाई नराम्ररी डुबाएको छ । सुकिला-मुकिलाले दुगडलाई आश्वासनमात्रै दिए, उनको नवनेपाल निर्माण पार्टीलाई भोट दिएनन् । यसपालिको चुनावमा मतदाताले जातीयताको कुरा गर्नेलाई मात्रै होइन, ठूला व्यापारी र घरानियालाई पनि नपत्याएको संकेत हो यो ।

दुगडको पार्टीले देशभर २२ जना उम्मेदवार खडा गरेको थियो, जसमा सय मत कटाउने ४ जना मात्रै देखिएका छन् । बाँकी सबैको मत दुई अंकको रहृयो । समानुपातिकमा पनि दुगडलाई संविधानसभामा पुर्‍याउने मत खसेको छैन । १ सय २४ क्षेत्रको मतगणना हुँदासम्म दुगडको पार्टी ४७ औं स्थानमा छ र ७ हजार २ सय २८ मत मात्रै पाएको छ । अहिलेको कुल खसेको मत अनुसार समानुतिकमा एक सभासदका लागि कम्तिमा २० हजार बढी मत चाहिने देखिन्छ ।