जनकपुर नगरपालिका वडा नम्वर १० स्थित देवी चोकमा विहिवार सांझ एक फुस घरमा आगलागी भएको छ । स्थानिय विनोद यादवको घरमा आगो ताप्न बालिएको आगोबाट सल्केर घरमा आगलागी भएको हो । आगलागीबाट सम्पुर्ण लत्ताकपडा, अन्न लगायत घरमा रहेको टिभी, पंखा, ग्यास चुलोका साथै नगद १० हजार समेत जलेर खरानी भएको पीडित यादवले बताएका छन । आगलागीबाट करिव सवा लाखको क्षति भएको पीडित परिवारले बताएको छ ।

सांझ करिव सवा पांच बजेको समयमा भएको आगलागीलाई स्थानिय लगायत बारुण यन्त्रको सहयोगले नियन्त्रणमा लिइएको थियो । घरमा रहेको सम्पुर्ण सामान जलेर नष्ट भएपछि यादवले छिमेकीको घरमा शरण लिएको स्थानिय वासी समेत रहेको समाजसेवी मिथिलेश कर्णले बताए । यादवको परिवारमा श्रीमती लगायत ५ छोराछोरी छन । सामान्य परिवारको यादव मजदुरी गरेर गुजारा गर्दै आएको स्थानिय कर्णले बताए ।