यस्तै रौतहट सखुअवा गाविसका किसान सुरेश यादवले पनि मिलसँग करिब ६० हजार रुपैयाँ लिन बाँकी छ । पुरानै पैसा लिन बाँकी भए पनि उहाँले यो वर्ष पनि शून्य मूल्यमा बेच्नका लागि मिलमा उखु ल्याएका छन् । उहाँले भन्नुभयो, “किसान धेरै मारमा छन्, पुरानै पैसा पाएको छैन नयाँको त कहिले हो कहिले ।”

रौतहटको गरुडामा रहेको श्रीराम सुगर मिलले एक सयभन्दा बढी किसानको गत वर्षको उखुको करिब २० करोड रुपैयाँ किसानलाई भुक्तान गर्न बाँकी छ । समयमा नै चिनी मिलले उखुको पैसा नदिँदा केही उखु किसानले यो वर्ष उखु खादसारी -सक्खर उद्योग)मा बिक्री गर्न थालेका छन् ।

गत वर्ष चिनी उत्पादक सङ्घ र उखु उत्पादक महासङ्घबीच भएको सहमतिअनुसार उखु प्रतिक्विन्टल ४ सय ८१ रुपैयाँ रहेको थियो । यो वर्ष सहमति नहुँदा किसानले शून्य मूल्यमा उखु मिललाई दिएका छन् । रौतहटको सङ्ग्रामपुरमा रहेको खादसारीले प्रतिक्विन्टल ३०० रुपैयाँमा उखु खरिद गरिरहेको छ । सो ठाउँमा १० भन्दा बढी सक्खर उद्योगहरु सञ्चालनमा छन् ।

रौतहटमा यस वर्ष ६ हजार ८ सय १९ बिघामा खुटी र आठ हजार ३ सय ६६ बिघामा मुरहन गरी जम्मा १५ हजार ३ सय ९९ बिघा जमिनमा उखुबाली लगाइएको जिल्ला कृषि विकास कार्यालयले जनाएको छ । श्रीराम सुगर मिलले यस वर्ष २५ लाख क्विन्टल उखु क्रसिङ गर्ने लक्ष्य राखेको छ । गत वर्ष मिलले करिब २० लाख क्विन्टल उखु क्रसिङ गरेको थियो ।

सो मिलका महाप्रबन्धक अशोक सिंहले उखुको मूल्य निर्धारण हुन नसकेपछि प्रतिक्विन्टल ४ सय रुपैयाँ पेस्की दिने सहमतिमा मिल सञ्चालनमा आएको बताउनुभयो । रासस